lipu sona pona |

musi Lisi Masan (Riichi Mahjong)

lipu ni li pini ala. ona li ken jo e sona ike. ona li ken jo ala e sona suli. / this document is not finished. it can have errors or missing content.

ken la, mi toki e nasin ale ala pi musi Lisi Masan. lipu nasin pi musi ni li suli mute. taso, sina wile musi kepeken musi pi sitelen tawa anu musi pi lipu kon la, lipu nasin ni li pona tawa sina. / This document probably doesn’t explain all the rules of riichi mahjong – this game has very complex rules, after all, but it’ll be enough for video games or online play.

nimi sin

lipu ni li kepeken e nimi “soto”, e nimi “teje”. ona li nimi pi pu ala. lipu ni li toki e ni: nimi ni li toki e seme?

musi Lisi Masan

musi Masan li musi supa.

jan 4 li utala kepeken musi ni tawa ni: ona li wile kama jo e mute pi nanpa pona ni: ona li suli #1.

tawa ni la, jan musi li wile pali e “luka” pona kepeken ijo musi.

musi “Lisi Masan” (Riichi Mahjong) li ante pi musi Masan tan ma Nijon.

ijo musi

sitelen pi ijo musi pi musi Masan

musi Lisi Masan la, ijo musi ante 34 li lon. ante wan la, ijo musi 4 sama li lon. ni la, ijo musi 136 li lon.

sinpin pi ijo musi li jo e sitelen. monsi pi ijo musi li jo ala e sitelen. nasin musi la, ona li sama lipu pi musi supa.

poka en anpa en sewi pi ijo musi li jo ala e sitelen. poka ona li suli. sewi en anpa ona li lili.

ijo musi ni li:

ijo musi nanpa ale li jo e nanpa. kulupu 3 pi ijo musi nanpa li lon:

kama mute la, jan li toki e kulupu ni kepeken nimi “kule”. nimi mute pi nasin Jaku li pali e ni.

nanpa pi ijo musi nanpa pi kulupu Mansu li sitelen lon ijo musi kepeken sitelen Kansi.

nanpa pi ijo musi 1 2 3 4 5 6 7 8 9
sitelen Kansi ona 一 二 三 四 伍 六 七 八 九
sitelen ante ken 五

nanpa pi ijo musi nanpa ante li sama ni: mute ijo lon sitelen ona.

ijo musi #1 pi kulupu Sosu li jo e sitelen waso.

ijo pi nanpa 1 en ijo pi nanpa 9 li “ijo pi nanpa pini” (nimi lili: nanpa pini). ijo pi nanpa ante li “ijo lili”.

ijo pi kon tawa ale li jo e sitelen Kansi pi nasin suli.

ijo pi akesi seli li ijo ni:

ijo pi kon tawa en ijo pi akesi seli li ijo wawa.

ijo musi li “open” la, sinpin ona li lon sewi. jan ale li ken lukin e sinpin ona.

ijo musi li “len” la, sinpin ona li lon anpa. jan ala li ken lukin e sinpin ona.

ijo musi li “lon luka sina” la, sinpin ona li lon poka ni: sina taso li ken lukin e ona.

nasin pi open musi

jan ale li kama jan musi pi nasin wan. nasin ni li sama nasin pi ijo pi kon tawa. musi mute la, jan musi li pali e ni:

jan musi li kama tawa supa musi lon nasin ni:

ale li pona, jan musi li lon ma sama ni:

              jan musi Sa
          +-----------------+
          |                 |
          |                 |
          |                 |
      jan |      supa       | jan
     musi |                 | musi
       Pe |      musi       | Nan
          |                 |
          |                 |
          |                 |
          +-----------------+
             jan musi Ton

ijo ni li toki e ni: tenpo seme li lon? tenpo open la, jan musi seme li jan musi pi nasin Ton

jan musi Ton li tawa e ilo sona pi tenpo musi lon poki ona lon nasin ni: poki pi sitelen “Ton” (東) li lon sewi. ona li toki e ni: kulupu pi tenpo musi pi nasin Ton li lon, jan ni li jan musi pi nasin Ton lon tenpo open.

jan ale musi li len e ijo musi ale. ona li tawa nasa e ona ale lon supa musi. ni li tawa ni: jan ale li wile ala sona e ni: ijo musi seme li lon seme?

ni li pini la, jan musi ale wan li wile pali e ni: o pali e “palisa” 2 pi ijo musi 17. ijo musi ale li wile awen lon nasin ni: sinpin ona li lon anpa. (poka pi ijo musi wan li wile “pilin” e poka ante pi ijo musi ante.) o tawa e “palisa” wan tawa sewi pi “palisa” ante. jan ale li pini e ni la, sinpin li lon. 

 .-.-.-.-.-.-.-.-.-.-.-.-.-.-.-.-.-.
 |_|_|_|_|_|_|_|_|_|_|_|_|_|_|_|_|_|
 |_|_|_|_|_|_|_|_|_|_|_|_|_|_|_|_|_|

(sitelen pi poka wan pi sinpin musi)

sinpin pini li wile lukin sama sitelen selo pi palisa 4 (nimi pi pu ala: “leko”).

jan musi Ton li tawa wawa e ilo pi nanpa nasa pi poka 6 tu. poka sewi ona li pana e nanpa. ona li toki e ni: sinpin li open lon poka seme?

nanpa poka sinpin
2,6,10 poka pi nasin Nan
3,7,11 poka pi nasin Sa
4,8,12 poka pi nasin Pe
5,9 poka pi nasin Ton

jan musi Ton li tawa wawa e ilo pi nanpa nasa tu lon tenpo sin. poka sewi ona li pana e nanpa. ona li toki e ni: sinpin li pakala lon ma seme? o nanpa tan nasin teje pi jan musi ni tawa nasin soto ona.


            1 1 1
            2 1 0 9 8 7 6 5 4 3 2  
            | | | | | | | | | | |
            V V V V V V V V V V V
  .-.-.-.-.-.-.-.-.-.-.-.-.-.-.-.-.-.
  |_|_|_|_|_|_|_|_|_|_|_|_|_|_|_|_|_|
  |_|_|_|_|_|_|_|_|_|_|_|_|_|_|_|_|_|
 (nasin soto)             (nasin teje)
           (jan musi)

jan musi Ton li kama jo e ijo musi 4 (supa 2 pi ijo 2) tan nasin soto pi ma ni.

 ilo pi nanpa nasa li pana e nanpa "6".

             o kama jo e ijo musi ni.
         \______________________/
                       |     
 .-.-.-.-.-.-.-.-.-. .-.-. .-.-.-.-.-.-.
 |_|_|_|_|_|_|_|_|_| |_|_| |_|_|_|_|_|_|
 |_|_|_|_|_|_|_|_|_| |_|_| |_|_|_|_|_|_|

jan musi Nan en jan musi Sa en jan musi Pe li pali e ijo sama.

          (#4)  (#3)  (#2)  (#1)
         j. Pe j. Sa j.Nan j.Ton
         _____ _____ _____ _____
 .-.-.-. .-.-. .-.-. .-.-. .-.-. .-.-.-.-.-.-.
 |_|_|_| |_|_| |_|_| |_|_| |_|_| |_|_|_|_|_|_|
 |_|_|_| |_|_| |_|_| |_|_| |_|_| |_|_|_|_|_|_|

poka ni li jo e ijo musi 2 taso la, o kama jo e ijo musi 2 tan ona, e ijo musi 2 ante tan nasin teje pi poka sinpin lon nasin soto.

sina lukin e supa musi tan sewi la, nasin pi ijo musi li sama nasin palisa pi ilo tenpo sike. (taso, nasin pi jan musi li ante monsi.)

   |||||||||||||||||
  =                 -
  =  .-------> --.  =
  =  | jan musi  |  =
  =     li kama  |  =
  =  ^ jo e ijo  V  =
  =  | musi lon     =
  =  | nasin ni. |  =
  =  `-- <-------'  =
  -                 =
   |||||||||||||||||

sitelen ni li pana lukin e sona ni: jan seme li kama jo e ijo musi seme lon tenpo seme? ijo seme li lon sinpin moli?

jan musi ale li pali e ijo sama, kepeken nasin nanpa sama, lon tenpo tu.

ni li pini la, jan musi ale li kama jo e ijo musi wan tan sinpin kepeken nasin nanpa sama.

nasin ante tan ma ni: sinpin li open pakala lon ma ni la, ijo musi 14 li weka tan sinpin, li kama “sinpin moli”.

 sinpin moli

 ijo musi lukin pi wawa Tola (sewi #3)
              |
              V
open     .-.-.-.-.-.-.-.
 ------->|_|_|_|_|_|_|_| pini
(sewi #1)|_|_|_|_|_|_|_|<-------- (anpa #7)

ijo musi sewi #3 pi sinpin moli li kama ijo musi lukin pi wawa Tola. o ante nasin e ona tawa ni: sinpin ona li lon sewi. ona li toki e ni: ijo musi ale pi nanpa kama, anu ijo musi pi sitelen kama, li ijo musi pi wawa Tola. jan li kama pona la, ijo pi wawa Tola li lon luka ona la, ona li kama jo e nanpa pona suli sin. (o kama sona e wawa Tola lon wan kama.)

ni li pini la, musi li open.

luka pona li seme?

jan ale li musi la, ona li wile jo e “luka pona”. ijo musi 14 ona li wile pona tawa nasin tu ni:

“kulupu” li seme?

kulupu ni pi ijo musi li lon:

luka pona li wile e kulupu 4. kulupu nasin en kulupu sama en kulupu suli li kulupu.

jan li toki e “kulupu” la, ona li toki ala e “kulupu lili”.

luka pona li wile e kulupu lili 1.

nasin Jaku li seme?

nasin Jaku li nasin ni: ijo musi ale sina li pona tawa ona la, sina ken kama pona. nasin Jaku mute li lon.

o sona e nasin Jaku pi pali kiwen ala ni:

tenpo musi

musi li open la, tenpo musi #1 pi nasin Ton li lon.

musi pi mute suli li jo e tenpo musi 8. ona li jo e tenpo musi 4 pi nasin Ton, e tenpo musi 4 pi nasin Nan. musi pi tenpo ni li jo e nimi “Ansan” (nimi Nijon: “Hanchan”, 半荘).

musi li ken jo e tenpo musi 4 taso. ni li lon la, ona li jo e tenpo musi 4 pi nasin Ton taso. musi pi tenpo ni li “musi pi nasin Ton taso”, li jo e nimi “Tonpusen” (nimi Nijon: “Tonpuusen”, 東風戦).

ni li ken: tenpo musi 8 li pini. taso, nasin musi li toki e ni: musi li pini ala. ni li lon la, tenpo musi pi nasin Sa li lon.

o sona e ni: tenpo musi ale la, jan musi Ton li jan musi #1.

mani musi en nanpa pona

open musi la, jan ale li kama jo e mute sama pi nanpa musi.

musi pi mute suli la, jan ale li kama jo e mani musi 25000, taso musi ante la, ona li ken jo e mute ante.

jan wan li kama jo e luka pona tan sinpin la, ona li kama jo e mani musi tan jan ale.

jan wan anu jan mute li kama jo e luka pona tawa ijo weka pi jan ante la, ona li kama jo e mani musi tan jan ni.

jan musi Ton li jo e luka pona la, ona li kama jo e mani musi pi mute suli. taso, ona li wile pana e mani musi la, ona li pana e mute suli ona.

jan li pana e mani musi tawa jan ante la, mute ona li kama tan nanpa pona suli (nimi Nijon: “An” / “Han”, 飜), tan nanpa pona lili (nimi Nijon: “Pu” / “Fu”, 符).

nasin Jaku en ijo musi pi wawa Tola li pana e nanpa pona suli.

kulupu en kulupu suli li pana e nanpa pona lili. kulupu pi ijo suli li pana e nanpa pona mute. kulupu len pi pana e nanpa pona mute. ijo ante li pana e nanpa pona lili. lipu ni li toki e ni lon wan kama.

nasin musi

jan musi Ton li jan musi #1. jan musi Nan li jan musi #2. jan musi Sa li jan musi #3. jan musi Pe li jan musi #4.

open la, tenpo tawa pi jan musi Ton li lon. ona li ante lon nasin nanpa. tenpo tawa pi jan musi Pe li pini la, tenpo tawa pi jan musi Ton li open.

tenpo tawa pi jan musi la, ona li pali e ni.

  1. ona li kama jo e ijo musi wan tan sinpin.

  2. ona li jo e ijo musi 14. ijo musi ni li “luka” ona.

  3. luka li pona la, ona li ken toki e ni: “luka mi li pona” (nimi Nijon: “Tumo” / “Tsumo”, ツモ ). ona li pali e ni la, tenpo musi li pini.

  4. jan li jo e kulupu suli lon luka ona la, ona li ken toki e nimi “Kan” (nimi Nijon: “Kan”, カン) (lipu ni li toki e nasin pi toki “Kan” lon wan kama.)

  5. luka li pona ala la, anu ona li wile ala ona li wile ala pali e ni la, ona li weka e ijo musi wan. (nasin ante li ken. lipu ni li toki e ona lon wan kama.)

jan li weka e ijo musi la, jan ante li pana e ona tawa ma pi ijo weka ona lon supa musi lon nasin pi ijo musi open. jan ale li ken lukin e ijo weka pi jan musi.

jan ante ale li ken pali e ni: ijo weka en luka ona li pali e luka pona la, ona li ken toki e ni: “pona tan ijo sina” (nimi Nijon: “Lon” / “Ron”, ロン). ona li pali e ni la, tenpo musi li pini. jan mute li ken toki “pona tan ijo sina” lon tenpo sama.

jan musi li ken kama jo e ijo weka lon nasin ni.

ona li pali e ni la , ona li kama jo e ijo weka, li tawa e ona, e ijo ante pi kulupu ni ni tawa poka pi luka ona. ona li ante e nasin pi ijo weka: ona li lon poka sama pi jan ni: ona li weka e ijo musi ni.

    toki       toki
  "Si","Pon"   "Kan"
  ___.--.--.   ___.--.--.--.
 |   |  |  |  |   |  |  |  | jan pi poka soto li weka e ijo musi ni.
 |___|__|__|  |___|__|__|__|

 .--.___.--.  .--.___.--.--.
 |  |   |  |  |  |   |  |  | jan pi poka sinpin li weka e ijo musi ni.
 |__|___|__|  |__|___|__|__|

 .--.--.___   .--.--.--.___ 
 |  |  |   |  |  |  |  |   | jan pi poka teje li weka e ijo musi ni.
 |__|__|___|  |__|__|__|___|

toki li toki “Kan” la, ni li lon:

sin la, jan li ken toki e nimi “Kan” tan luka ona taso (ni li lon la, kulupu suli ona li “kulupu suli len”). luka ona li len la, luka ona li kama open ala. ni li lon, ijo musi tu pi kulupu suli ona li kama open. ijo tu ante li kama len.

ijo musi ni li open, li ante nasin tawa ni: sewi pi sinpin ona li lon poka pi sewi ona. ona li ken ala weka e ijo musi ni, li ken ala ante e kulupu ni. luka ona li “luka open”.

tenpo tawa ona li lon. ona li wile weka e ijo musi wan.

jan ala li kama jo e ijo musi weka la, tenpo tawa pi nanpa kama li lon.

luka open en luka len

jan musi li kama ala jo e ijo musi tan jan musi ante la, luka ona li len. ante la, ona li open. luka open li pona lili. luka len li pona suli. ni li tan ni:

kama Tenpa en toki “Lisi”

jan musi li ken jo e luka ni: luka li ken kama pona kepeken ijo musi wan ante taso. ni li lon la, luka ona li jo e kama Tenpa (nimi Nijon: “Tenpai”, テンパイ).

kama Tenpa li lukin ala e ni: ijo musi seme li ken ala kama tawa luka?

luka ni li len la, jan li weka e ijo musi la, ona li ken toki “Lisi” (nimi Nijon: “Riichi”, リイチ). ona li pali e ni la, ni li lon:

jan li toki “Lisi” la, ona li pona tawa nasin Jaku “Lisi”, li kama jo e nanpa pona suli 1. taso, ona li ken ala ante e “ijo pona ken” pi luka ona:

nasin Jaku

sitelen ni li pana lukin e luka pona pi nasin Jaku ante

jan li wile kama jo e luka pona la, ona li wile pona tawa nasin Jaku. nasin Jaku mute li lon. luka pona li ken pona tawa nasin Jaku wan anu nasin Jaku mute.

nasin Jaku li pana e nanpa pona suli tawa luka pona.

nasin Jaku ni li lon:

nasin sina li sama nasin tenpo la, sina kama jo e nanpa pona suli 2.

nasin Jaku pi suli Jakuman

luka sina li pona tawa nasin Jaku ni la, sina kama jo e suli Jakuman.

  • ijo Mansu pi nanpa 1
  • ijo Mansu pi nanpa 9
  • ijo Pinsu pi nanpa 1
  • ijo Pinsu pi nanpa 9
  • ijo Sosu pi nanpa 1
  • ijo Sosu pi nanpa 9
  • akesi walo
  • akesi loje
  • akesi laso
  • kon pi nasin Ton
  • kon pi nasin Nan
  • kon pi nasin Sa
  • kon pi nasin Pe
  • ijo wan ante ni: ona li sama ijo wan pi luka sina.
  • ijo Sosu 2
  • ijo Sosu 3
  • ijo Sosu 4
  • ijo Sosu 6
  • ijo Sosu 8
  • ijo akesi laso

nasin sitelen mute pi ijo musi pi musi Masan la, ijo musi ni li jo e kule laso taso lon sinpin ona.

  • ijo 3 pi nanpa 1
  • ijo 1 pi nanpa 2
  • ijo 1 pi nanpa 3
  • ijo 1 pi nanpa 4
  • ijo 1 pi nanpa 5
  • ijo 1 pi nanpa 6
  • ijo 1 pi nanpa 7
  • ijo 1 pi nanpa 8
  • ijo 3 pi nanpa 9
  • ijo nanpa pi kule sama

nasin pi nanpa pona

luka li pona la, jan musi li nanpa e ni: ona li jo e nanpa pona suli pi mute seme? ona li jo e nanpa pona lili pi mute seme?

nanpa pona suli li kama tan nasin Jaku, tan wawa Tola.

nasin Jaku li pona tawa luka la, ona li pana e nanpa pona suli tawa ona.

luka li jo e ijo pi wawa Tola, nanpa pona suli pi mute sama li pana tawa ona.

wawa Tola

sinpin moli la, ijo musi open li “ijo musi lukin pi wawa Tola”. ona li toki e ni: ijo seme li jo e wawa Tola?

taso, ona li pali lon nasin ni: ijo musi lukin li jo e ijo nanpa, ijo pi nanpa kama wan li kama jo e wawa Tola.

(ijo lukin li jo e ijo Mansu pi nanpa 4 la, ijo Mansu pi nanpa 5 li jo e wawa Tola.)

ijo lukin li jo e ijo pi nanpa 9 la, ijo pi nanpa 1 pi kule kama li jo e wawa Tola.

sina ken awen e sona ni lon nasin ni: lipu pi nimi ale pi toki pona la, nimi “laso” li lon open tawa nimi “loje”. nimi “loje” li lon open tawa nimi “walo”. nasin ona li ni: laso -> loje -> walo.

ijo lukin li ijo kon la, ijo kon kama li jo e wawa Tola.

luka pona li jo e ijo mute pi wawa Tola la, ona li jo e mute sama pi nanpa pona suli.

nanpa pona lili

nanpa pona lili li kama tan ijo mute.

luka pona li len, li kama jo e ijo pona tawa jan ante la, ona li jo e n.p.l. 30.

luka pona li jo e nasin Jaku “kulupu lili 7” la, ona li jo e n.p.l. 25. (ona li kama jo ala e nanpa pona sin tan anpa pi lipu ni.)

kama ante la, ona li jo e n.p.l. 20.

luka pona li jo e kulupu sama, e kulupu suli la, ona li kama jo e nanpa pona lili sin.

kulupu lili pi luka pona li jo e ijo akesi anu ijo kon pi nasin sama jan anu ijo kon pi nasin sama tenpo la, ona li pana e n.p.l. 2.

ona li jo e ijo kon pi nasin jan la, nasin jan li sama nasin tenpo la, nasin mute la, ona li pana e n.p.l. 4.

nanpa pona lili ni li kama tan ijo pona ken pi luka pona.

ijo pona ken li lon insa pi kulupu nasin la, ni li pana e n.p.l. 2.

ijo pona ken li lon poka pi kulupu nasin la, poka wan taso li lon la, nu li pana e n.p.l. 2.

ijo pi nanpa 8 en 9 pi kule sama li ken pana e kulupu nasin tan poka wan taso tan ni: ijo pi nanpa 7 li lon. ijo pi nanpa 10 li lon ala. ni li sama tawa ijo pi nanpa 1 en 2.

kama Tumo li lon (luka li kama pona tan sinpin) la, ni li pana e n.p.l. 2.

luka pona li open, li jo e nanpa pona lili 20 taso la, ona li jo e n.p.l. 30.

ni li pini la, mute pi nanpa pona lili li suli tawa kulupu poka pi nanpa 10.

n.p.l. 20 li awen n.p.l. 20. n.p.l. 21,22,23…29 li kama n.p.l. 30. n.p.l. 30 li awen n.p.l. 30. n.p.l. 21,22,23…29 li kama n.p.l. 40. sama li lon tawa nanpa suli.

mani musi

nanpa pona lili en nanpa ona suli pi luka pona li lon la, jan musi li kama sona e ni: jan seme li wile pana e mani musi seme tawa jan pi luka pona?

lipu tu ni li lon tan ni.

lipu #1 li pona tawa ni: jan pi nasin Ton ala li jo e luka pona la, ona li kama jo e mute seme pi mani musi?

lipu #2 li pona tawa ni: jan pi nasin Ton li jo e luka pona la, ona li kama jo e mute seme pi mani musi?

lipu nanpa pi mani musi #1

lipu nanpa pi mani musi #2

sin la, jan li toki “Lisi”, li weka e mani musi 1000 la, jan pi luka pona li kama jo e ona.

sin la, palisa lukin pi mani musi sin (nimi Nijon: “Onpa” / “Honba”, 本場) li ken lon. ona li lon la:

ijo pona li kama tan weka pi jan ante la, jan mute li ken jo e luka pona tan ona. ni li lon la, jan pi luka pona li kama jo e mani musi tan jan sama. jan ni li kama jo e mani musi pi toki “Lisi”: ona li lon tenpo open #1 kama tawa jan ni: ona li weka e ijo pona.

jan ala li jo e luka pona

sinpin li jo e ala la, jan ala li jo e luka pona la, ni li kama:

jan 1 li jo e kama Tenpa la, ona li kama jo e mani musi 1000 tan jan ante ale.

jan 2 li jo e kama Tenpa la, jan #1 li kama jo e mani musi 1500 jan #1 pi kama Tenpa ala. jan #2 li kama jo e mani musi 1500 tan jan #2 pi kama Tenpa ala.

jan 3 li jo e kama Tenpa la, jan pi kama Tenpa ala li pana e mani musi 3000 tawa jan ale ante. (jan wan ale pi kama Tenpa li kama jo e mani musi 1000.)

jan ala anu jan ale li jo e kama Tenpa la, mani musi li pana ala.

jan pi toki “Lisi” li weka e mani musi 1000 la, mani musi ni li awen. jan pi luka pona li ken kama jo e ona lon tenpo musi kama.

ante pi tenpo musi / palisa lukin pi mani musi sin

jan Ton li jo e luka pona la, tenpo musi li ante ala. o sin e palisa lukin pi mani musi sin.

jan ala li jo e luka pona la, jan Ton li lon kama Tenpa la, tenpo musi li ante ala. o sin e palisa lukin pi mani musi sin.

tenpo musi li pini ike la, tenpo musi li ante ala. o sin e palisa lukin pi mani musi sin.

musi mute la, palisa lukin pi mani musi sin li sama palisa pi mani musi 100. taso, ona li pali ala sama mani musi. ona li kama ala tan mani musi pi jan musi.

musi mute la, jan musi li jo e mani musi ala la, musi li pini.

musi mute la, nasin ante li lon: tenpo tawa pi nanpa pini li pini la, jan ala li jo e mani musi 30000 la, tenpo tawa sin li open.

palisa pi mani musi

musi pi ijo lon la, jan li kepeken e palisa pi mani musi.

kulupu 4 pi palisa pi mani musi li lon:

pini ike

tenpo musi li ken pini ike lon nasin ni:

musi li pini ike la, mani musi li ante ala.

musi pi sitelen tawa

sina wile musi e musi Lisi Masan la, nasin mute li lon. nasin pona li musi kepeken musi pi sitelen tawa. ona li toki e ni tawa sina: sina ken toki e nimi “Si”, “Kan”, “Pon”, “luka mi li pona”, “pona tan ijo sina” lon tenpo seme? luka pona sina li pali e mani musi pi mute seme?

sina ken musi lon poka jan ante kepeken lipu kon MahjongSoul. ona li toki e toki Inli, e toki Sonko pi nasin sitelen pi tenpo pini. ona li pona mute tawa jan sin.

lipu kon Tenhou li pona lili tawa jan sin. jan pi sona mute li musi kepeken ona. ona li ken toki e toki Nijon, e toki Inli, e toki Sonko, e toki Anku/Soson (한국어/조선말), e toki Losi (Русский), e toki Kanse, e toki Italija, e toki Epanja, e toki Wije (Tiếng Việt). taso, sitelen mute li kepeken e toki Nijon taso.

musi pi sitelen tawa “sama akesi seli” (龍が如く / “Yakuza”) li jo e tomo pi musi Lisi Masan lon insa ona. sina ken musi lon poka ilo musi kepeken ona.

sin la, mi pali e ante toki pi musi “musi Masan pi jan musi 4” (“4 Nin Uchi Mahjong”, “４人打ち麻雀”). ante toki ni li toki kepeken toki pona. sina ken kama jo e lipu ante pi ante toki lon lipu ni.

sona sin

nasin nanpa tan musi Lisi Masan

toki Nijon la, nimi nanpa mute li lon. taso, wan ona li kalama sama nimi pi toki pona. musi Lisi Masan la, nimi nanpa li ante, li ken kama pona lon toki pona.

nanpa nimi nanpa
1 i
2 ja
3 san
4 su
5 u
6 lo
7 si
8 pa
9 ku
10 su
100 jaku
1000 sen
10000 man

nimi “Jaku” pi “nasin Jaku” li ante tan nimi nanpa “jaku” pi nanpa 100.

This website's source code is available on GitHub.